ሰንበትካ ሰንበተ ኢያሪኮ ከይትኸውን ተጠንቐቕ !

በስመአብ ወወልድ ወመንፈስ ቅዱስ አሐዱ አምላኽ።

ንስሪ ደሴት ፍጥሞ

በስመ አብ ወወልድ ወመንፈስ ወመንፈስ ቅዱስ አሐዱ አምላክ አሜን!

ደብረ ታቦት ሓንቲ ካብተን ትሽዓተ ዓበይቲ በዓላት ጎይታ ዝበሃላ እያ። ኣብዛ ዕለት እዚኣ እግዚአብሔር ወልድ ክብሩ ዝገለጸልና፡ ጸሎት ኩሎም ቅዱሳን ውን ዝተመለሰላ እያ። ነቢይ ሙሴ ገጽ እግዚአብሔር ክርኢ ኣብ ዝሓተተሉ፡ ንእግዚአብሔር ብድሕሪቱ እምበር ብቅድሚቱ ክርእዮ ኣይተፈቅደሉን ነበረ። (ዘፀ.33፡23) እዚ ማለት ድማ ንጎይታ ብምስጢረ ተዋህዶ ፍጹም ሰብ ፍጹም ኣምላኽ ድሕሪ ምኳኑ እምበር ብቅድሚኡ ክርእዮ ከምዘይክእል እዩ ዝገልጽ። ድሕሪ ነዊሕ ዘመን እምበርኣር ሕቶ ነቢይ ሙሴን ሕቶ ኩሎም ኣበው ቀደምትን ኣብ ደብረ ታቦር ንሙሴ ኤልያስን ብውክልና ጸዊዑ መለሰሎም። ገጹ ኣርኣዮም ምስኡ ድማ ተዘራረቡ። (ማቴ፡ 17፥3) ደብረ ታቦር መድኃኔዓለም ክርስቶስ ኣባና ዘለዎ ፍቅሪ ዝገለጸላ ቅድስቲ እምባ እያ። እዛ ዕለት እዚኣ ኣማኑኤል ኣምላኽና ምስጢረ መንግስቱ ዝገለጸላ ኣዝያ ክብርትን ቅድስትን ዕለት እያ። እዛ ደብረ ታቦር ዝተባህለት እምባ ድማ ብዙሕ ምስጢርን ፍቅርን ዝተገልጸላ እምባ ስለዝኮነት ታሪኻዊትን ዝተባረኸትን እምባ እያ። እቲ ብትሕትንኡ ዝልለ ሊቀ ሓዋርያት ቅዱስ ጴጥሮስ ድሕሪ ነዊሕ ዓመታት ነዛ እምባ ክዝኽራ እንከሎ፡ "ቅዱስ እምባ" ክብል ዘኪርዋ። (2ይ ጴጥ. 1፡18 )ኣብ ደብረ ታቦር ሕቶ ናይ'ቶም ዝኣምንዎን ዝጽበይዎን ዝነበሩ ነቢያት ጥራሕ ዘይኮነ፡ ሕቶ ናይ'ቶም ተጠራጠርቲ ንጎይታናን መድሓኒናን ኢየሱስ ክርስቶስ፡ ብጥርጠራ ገሊኦም ኤርሚያስ ገሊኦም ኤልያስ ገሊኦም ሓደ ካብ ነብያት እዩ ዝብልዎ ዝነበሩ ውን ተመሊሱ እዩ። (ማቴ፡16፡14)እግዚአብሔር ወልድ ንሱ ሓደ ካብ ነቢያት ዘይኮነስ ኣምላከ ነቢያት ምኳኑ ከረጋግጸሎም፡ ንሙሴ ካብ ብሄረ ምዉታን ንኤልያስ ድማ ካብ ብሄረ ህያዋን ጸዊዑ ኣብ ደብረ ታቦር ኣዘራረቦም። እቲ ብእኡ ዝሰመርኩ ፍቱው ወደይ ንሱ እዩ ዝብል ድምጺ ናይ እግዚአብሔር ኣብ ድማ ካብ ሰማይ ኣማኑኤል ወዲ ህያው ኣምላክ ምኳኑ መስከረ። ብክርስቶስ ዝኸበርኩም ኣንበብቲ እዛ ዕለት እዚኣ ብህይወት ንዘለዉ ጥራሕ ዘይኮነስ ንዝሙቱ ከይተረፈ ሕቶ ደቂ ሰባት ዝምለሰላ ዕለት እያ። ስለዚ ንእግዚአብሔር ሕቶና ብጸሎት ከነቅርበላ ይግባእ። ንሱ ኣብ ሰማይ እትነብር ኣቦና ኢልኩም ጸልዩ፡ ኣቦና ኢልኩም ጸውዑኒ ኣነ ድማ ውሉደይ ክብለኩም እየ ስለዝበለና፡ ከም ውሉድ ንወላዲኡ ከይተሰከፈ ድሌቱ ዝሓቶ እሞ እቲ ወላዲ ከኣ ዝጠቅሞ ዝህቦ፡ ንሕና 'ውን ድሌትና ብጸሎት ክንሓትት ይግባእ እዩ። እግዚአብሔር ድማ ብርግጽ ዘድልየናን ዝጠቅመናን ኣብ ግዜኡ ክህበና እዩ። ከምቲ ወላዲ ንውሉዱ ወላ ኣብ ዝጋገየሉ ግዜ ካብ ጌጋኡ ክምለስን ዝምዕዶን ዝጽበዮን እምበር ዘይጸልኦን ዘይሰጎን፡ እግዚአብሔር ውን ንዓና ብንስሓ ካብ ጌጋና ክንምለስ ደኣ ይጽበየና እምበር ፈጺሙ ከምዘይጸልኣና ኣሚና፡ ብንስሓ ክንምለስ ይግባእ። በረኸት ናይ ኣብ ፍትወት ናይ ወልድ ሃብቲ ናይ መንፈስ ቅዱስ ምስ ኩልና ህዝበ ክርስቲያን ይኩን። ኣሜን!

አልቦ ዘቅድሜሁ ወአልቢ ዘድሕሬሁ ማኅሌታይ ሰብእ ዘከማሁ፡ ያሬድ ካህን ለክርስቶስ ሰበከ ትንሳኤሁ፡ ኢየዐዱ እንስሳ ወሰብእ እምነ ሠላስ ዜማሁ።

ኣብዚ ዕለት 19 ጥቅምቲ በዓለ ዕርፍቲ ጻድቅ ኣቡነ ሰይፈሚካኤል እዩ። ኣቡነ ሰይፈሚካኤል ኣብ ሃገርና ኤርትራ መስራቲ ገዳም ጻዕዳ እምባ ስላሴ እዮም። ኣብዚ ገዳም ድማ ኣብዚ ዕለት በዓለ ዕረፍቶም ብዓቢ ድምቀት ይክበር። ካብ ምሉእ ሃገር ብዝመጹ ነጋዶ ይምዕርግ። እዚ ገዳም ኣብ ዓመት ክልተ ግዜ ስለዝንገድ እቲ ቀዳማይ ሥላሴ ሓምለ ክከውን እንከሎ ካልኣይ ድማ ኣብ ዕለት 19 ጥቅምቲ ዝክበር ዕረፍቲ ጻድቅ ኣቡነ ሰይፈሚካኤል ዝዝከረሉ እዩ። ነዚ ክብረ በዓል ፍልይ ዘብሎ ድማ ዝበዝሑ ነጋድያን መንእሰያት ቤት ትምህርቲ ሰንበትን ተማሃሮ ኮለጃትን ምዃኖም እዩ። https://youtu.be/jLpPoahbQsA?si=MfoRS9y-7Ybb-abAኣቡነ ሰይፈሚካኤል ዳግማዊ ሙሴ ዝበሃልሉ ምክንያት ካብ ገዳም ኣቡነ ሳሙኤል ዋልድባ ኢትዮጵያ ናብ ሃገርና ኤርትራ እናተመልሱ እንከለዉ ከምቲ ባሕሪ ኤርትራ ንሊቀ ነቢያት ሙሴ ምስ ኩሎም ህዝቢ እስራኤል ኣብ ክልተ ተኸፊሉ ዘሕለፎም፡ ንኣቡነ ሰይፈሚካኤል ውን ምስ ኣርድእቶም ውሑጅ ሩባ ተከዘ ኣብ ክልተ ብምኽፋል ብድሩቅ መሬት ከምዘስገሮም መጽሓፈ ገድሎም ይሕብር። ካብታ ታሪኽ ዝተሰርሐ መዝሙር ኣብዚ ሊንክ ኣሎ https://youtu.be/k0gyWdveYL0?si=Jdy9O46TKtVS7rNH ዳግማዊ ሙሴ !

ወርሓዊ በዓል ቅዱስ ሚካኤል ዘወርሓ ጥቅምት፡በዚ ዕለት እግዚአብሔር ንቅዱስ ሚካኤል ሊቀ መላእክት ናብ ነቢይ ሳሙኤል ብምልኣኽ፡ ናብቲ ኣብ ቤተ ልሄም ዝነብር ዝነበረ ኣቦ ዘማራይ ዳዊት ዝኾነ እሴይ ኽከይድ እሞ ካብ ደቂ እሴይ ንእስራኤል ዘመሓድር ንጉስ ክቀብዕ ለኣኾ። ነቢይ ሳሙኤል ከኣ ብመሪሕነት ሊቀ መላእክት ናብ እሴይ ከይዱ ካብ ኩሎም ደቂ እሴይ መሪጹ ንንጉሥ ዳዊት ቅብኣ ንግሥነት ቀብኦ። ቅዱስ ሚካኤል ከኣ ንዘማራይ ንጉስ ዳዊት ኣብ ምሉእ ዘመኑ ይረድኦ ነበረ።